دافغان غږ
 زه افغان یم په ما شوې څه بلا ده
                          جهالت ته مې تل مخ پوهې ته شا ده
هر صیا د یم  په خبرو غولولی
                       ښه يې وینم چې چاړه په لاس د چا  ده
څوک مې وژني په راکټ څوک په بمونو
                    ښه پوهیـږم دا د خدای (ج) کله رضـا ده
درپه دراوآواره دنـیـا کې ګـرځـم
                          یوې نړۍ کې په افغان بله هوا  ده
لوږه ،تنده مې قسمت کې دېره شوې
                        خپل هېواد کې هره ورځ زما ژړا ده  
رڼا ورځ مې توره شپه کړه غلیمانو
                     چې چېرې ځم په هغه کلي کې غوغا ده
هرځای ګورم انفجار،آرامي نه شته
                              دخدای در کې قبوله زما کله دعا ده                         
زما پهِ غوښو دهوا مرغان ماړه شوو
                       دغه سلګۍ مې هر غلیم ته د خندا ده
ظلم زور په ما تیریږي بې اندازه
                         جـوړه شوې زما له کلي کربلا ده
ګلسیریه! راشه ورو ورو غشي وله
               ځکه آرام ژوند دې افغان اولس ته تمنا ده
         استاد ګلسیری شینواری ۹-۲ ۹۷